Wo to ik khawab e preshan tha jo me ne dekha
Wo to sab dard ke lamhey thay,
Jo mujh pe guzrey
Meray weeran mah o sal
Meray sham o seher
Meri majrooh mohabbat meri darman talbi
Sar dehleez e raqeeban
Meri deryuza gari
Aankh me ashk nadamat ke
To chehrey per fishar e dil o jaan
Mera mazi bhi andhera
Mera farda bhi dhuan
Main kahan dhundta
Khoi hui hasti ke nishan
Tu yhan tha na wahan
Main yahan tha na wahan
Wo to sab dard ke lamhey thay,
Jo mujh pe guzrey
Phir ye kiun he
Ke mera jism mera khun
na hua khakistar
Koi is dard ke dozakh me
Mah o sal talak jal ke bhi Istada raha
Zinda rehne per musir Or nai zeest ka dildada raha
Nai saj dhaj se basar karne per aamada raha
Bas isi dard ke dozakh ka raha hun eendhan
Ab jo ubhra hun to is aag se kundan ho kar
Main ne is husn ko paya he boht kuch kho kar
Apney bikhrey huey pindar ka reza reza
Chun raha hun shab sehra se sitaron ki tarha
Apney malboos e dareeda ke preshan tukrey
Janbish sozan e umeed ki khyati se
Si raha hun ke mera ism barhana na rahey
Meray derina hareefon ke labon per koi taana na rahey
Mujh per qarz gham e jan o gham e dunya na rahey
Wo to sab dard ke lamhey thay
Jo mujh pe guzrey
Or ab main nae mosam me
Kisi shola bebak kisi parcham e pran ki tarha
Kurra e khak me lehraney laga hun phir se
Ae meray lamha e aaenda ae meray shoq ke farda
Teri manzil ki taraf aaney laga hun phir se
Apney khashak ko,
Angaar se chamkaney laga hun phir se!!!
