aankhon me koi khawab utarne nahin deta
ye dil ke mujhe chain se marne nahin deta
bichrey to ajab piyar jitata he khaton me
mil jae to phir had se guzarne nahin deta
wo shakhs khizan rut me bhi mohtat he kitna
sookhey huey phoolon ko bikharne nahin deta
ik roz teri piyas khareedey ga wo ghabroo
pani tujhe panghat se jo bharne nahin deta
wo dil me tabassum ki kiran gholne wala
roothey to ruton ko bhi sanwarne nahin deta
main us ko manaun ke gham e deher se uljhun
Mohsin wo koi kam bhi karne nahin deta