meri sanson ki khushbu se tujhe zanjeer hona he
abhi is khawab ko sharminda e tabeer hona he
ye keh kar apni mehroomi ko behlata he dil apna
agar wo chand he to phir usey taskheer hona he
meray lafzon ki laghzish keh rahi thi aj mehfil me
ke teri khamoshi ko hasil taqreer hona he
jabeen to kher dagh e bandagi se bujh gai lekin
dua ko be niaz e halqa e taseer hona he
wo jin ke khoon se dastar e qatil ho gai rangeen
unhi ke maqtalon ki khak ko akseer hona he
hamare ghar pe girti bijlion ko kia khabar Mohsin!
ke is malbe pe ik taza nagar tameer hona he
———————————————————————
More great lines by Mohsin Naqvi:
samajh na saka mere chand koi dard tera
misal e barg e khizan rang kiun he zard tera
jita raha he mujhe kitni sohbaton ka firaq
bujha bujha ye badan ,hath sard sard tera
wo fasla jise sehrae aagahi kahiye
bhatak gaya usi sehra me rah nord tera
bichar chala he to apne nishan mitata ja
pata batae ge ab raste ki gard tera
bikhar bikhar ke hawa ne ye karwan se kaha
bichar gaya kisi raste me koi fard tera