gum sum hua,awaz ka darya tha jo ik shakhs
patthar bhi nahi ab wo,sitara tha jo ik shakhs
shaed wo koi harf e wafa dhund raha tha
chehron ko barey ghor se parhta tha jo ik shakhs
sehra ki tarha der se pyasa tha wo shaed
badal ki tarha toot ke barsa tha jo ik shakhs
ae tez hawa koi khabar us ke junoon ki
tanha safar e shoq pe nikla tha jo ik shakhs
ab akhri satron me kahin nam he us ka
ahbab ki fehrist me pehla tha jo ik shakhs
hathon me chupae hue phirta he kai zakham
sheshey ke khilonon se behelta tha jo ik shakhs
mur mur ke use dekhna chahen meri ankhen
kuch door mujhe chorne aya tha jo ik shakhs
ab us ne bhi apna lye dunya ke qariney
saye ki rafaqat se bhi darta tha jo ik shakhs
har zehen me kuch naqsh e wafa chor gaya he
kehne ko bharey sheher me tanha tha jo ik shakhs
munkir he wohi ab meri pehchan ka Mohsin
aksar mujhe khat khun se likhta tha jo ik shakhs
=~=~=~=~=~=~=~=~=~=~=~=~=~=~=~=~=~=~
Next to read:
Shamil Mera Dushman Saf e Yaran Me Rahe Ga!!
