Seher ke suraj
Main ro raha hun
Ke mera mashriq lahu lahu he
Wo mera mashriq
jo mera bazu he
Mera dil he
Meri namu he
Jo mere atraf ka nishan
Meri aabru he
Lahu lahu he
Seher ke suraj
Main nisf tareek
Nisf roshan hun
Kia hua he
Tujhe gehen lag gya
Ke mera wujood tukron me bat gaya he
Teri shuaaon ka noor andheron me
Ghat gaya he
Ke aj her rishta e rafaqat hi kat gaya he
Seher ke suraj
Main apne pekar ki nisf tasweer ho gaya hun
Main ap hi aj apni tehqeer ho gaya hun
Main sam e tasgheer ho gaya hun
Main apna adha badan lye kis taraf ko jaun
Kise dikhaun
Ye shesha e jaan ki kirchian
Apne khawab rezey kahan chupaun
Main apni wahdat kahan se laun
Seher ke suraj
Sitam ki aandhi rukey
To main ye ujar aankhen jhapak sakun ga
Lahu ki barish thamey
To main is dukhi badan ko thapak sakun ga
Abhi to main jankuni ke dohrey azab me hun
Jo bujh chukey wo chiragh dekhun
Ke apne mathey ka dagh dekhun
Seher ke suraj
Meri nazar me to un rafiqon ke qafiley hen
Jo ghar se nikle they sar uthaey
Qadam jamae
Jo muntazir they
Ke razm gah e talb bulaey
Jo aazmaish ki her ghari me
Yaqeen ki mishalen jalaey
Watan ki namoos ke lye
Beshumar bazu alam uthaey
Chalay thay ghar se ye ahd kar ke
Ke in ki jaanen rahen ke jaen
Magar wafa pe na harf aye
Seher ke suraj
Meri nazar me unhi rafiqon ke qafiley hen
Ke jin ka pindar reza reza
Ke jin ke mathey arq arq hen
Jo pa ba e zanjeer
Munfail gardanen jhukaey
Adu ke narghey me
Un andheron ki sarzameen ki taraf rawan hen
Jahan hiqarat ke taan
Nafrat ke sang
Ruswaion ke bazar
muntazir hen
Wahan jahan somnat ke pathron se
Kitney he mere mehmood ghaznavi sangsar hon ge
Wahan!
Jahan meri sari tareekh ke warq sharmsar hon ge
Seher ke suraj
Ye main na dekhun
Ye tu na dekhe
Ye ghazion ki nazar na dekhe
Ye jan nisaron shaheed yaron ka
Chamchamata lahu na dekhe
Ye me na dekhu
Ye tu na dekhe!!!
by Ahmed Faraz
