Aazurdagan e sheher ka jesa bhi hal ho
Ae yar khush dayar tujhe kiun malal ho
Ab bat dosti ki nahin hosley ki he
Lazim nahin ke tu bhi mera ham khayal ho
Ab ke wo dard de ke main rooun tamam umar
Ab ke laga wo zakhm ke jena mohal ho
Pehley wo iztarab tujhe kis tarha bhulaen
Ab ye azaab kesey tabiat bahal ho
Khud mera hath jab meri barbadion me tha
Teri jabeen pe kiun arq e anfa’al ho
Phir tu ne chair di he gai sa’aton ki bat
Wo guftagu na kar ke tujhe bhi malal ho
Meri zaruraton se ziada karam na kar
Aesa sulook kar ke merey hasb e hal ho
Toota to hun magar abhi bikhra nahin Faraz
Merey badan pe jesey shikaston ka jaal ho
