Sitam ka aashna tha wo sabhi ke dil dukha gaya
Ke sham e gham to kat li seher hui chala gya
Hawa e zulm sochti he kis bhanwar mein agai
Wo ik diya bujha to sainkron diye jala gaya
Sakoot mein bhi us ke ik ada e dilnawaz thi
Wo yar kam sukhan kai hikayeten suna gaya
Ab ik hujoom e aashqan he, her taraf rawan dawan
Wo aik rah naward khud ko qafila bana gaya
Dilon se wo guzar gaya shuaa e meher ki tarah
Ghaney udas janglon me rasta bana gaya
Kabhi kabhi to yun hua he is riaz e deher me
Ke ak phool gulistan ki aabroo bacha gaya
Shareek e bazm e dil bhi hen,chiragh bhi hen,phool bhi
Magar jo jaan e anjuman tha wo kahan chala gaya
Utho sitam zado chalen ye dukh karra sahi magar
Wo khush naseeb he ye zakhm jis ko ras aagya
Ye aansuon ke haar khun baha nahin hen dosto
Ke wo to jaan de ke qarz e dostan chuka gaya!!!
