kia doobte huon ki sadaen samet tin
sailab ki sama, aten aandhi ko rehen thin
kaai ki tarha lashen chatanon pe ug gaen
zarkhezion se apni preshan thi zameen
peron ka zarf wo ke jaren tak nikal din
pani ki pyas aesi ke bujhti na thi kahin
bachon ke khawab pi ke bhi halqoom khushk thay
darya ki tashnagi me bari wehshaten rahin
barish ke hath chunte rahe bastion se khawab
neenden hawae tund ki mojon ko bha gaen
malbe se har makan ke, nikle hue thay hath
aandhi ko thamne ki bari koshishen huin
taweez wale hath magarmach ke pas thay
teh se,dua likhi hui peshanian milin
mojon ke sath sanp bhi phunkarne lagey
jangal ki dehshaten bhi samandar se mil gaen
bas raqs panion ka tha wehshat ke raag per
darya ko sab dhunen to hawaon ne likh ke din