tujh se rabt itna, gham e sham o sahar, apna he
aks tera he magar deeda e tar, apna he
ji me aya to kabhi phor he dalen ge usey
gher ke hath ka patthar nahi, sar apna he
wehshat e jan kabhi fursat ho to is simat bhi aa
sheher se door sahi, dasht bhi ghar apna he
doobte doobte suraj ne siah shab se kaha
chand ubhra bhi to kia, lakht e jigar bhi apna he
barish e sang ki hebat se muqfal hen makan
han bhare sheher me wa he jo, wo dar apna he
be hijabana mile us se to ye bhed khula
khalq ka khof nahi he usey dar apna he
wo jo manzil he sar hadd e nazar teri he
ye jo chehra he pas e gard e safar, apna he
sach bhi kehte hen magar jhoot ki lay me Mohsin
kuch dinon se yehi andaz e hunar apna he
