Har Zarra e Umeed Se Khushbu Nikal Aaye
Tanhaai Ke Sehra Me Agar Tuu Nikal Aaye…!
Kaisa Lage Is Baar Agar Mousam e Gul Mei
Titli Ka Badan Orh Kar Jugnu Nikal Aaye…!
Phir Din Teri Yaadon Ki Munderon Pe Guzra
Phir Shaam Hui Aankh Se Aansu Nikal Aaye…!
BeChaen Kiye Rehta Hai Dharka Yehi Jee Ko
Tujh Me Na Zamane Ki Koi Khu Nikal Aaye…!
Phir Dil Ne Kia Tark e Talluq Ka Irada
Phir Tujh Se Mulaqaat Ka Pehlu Nikal Aaye…!
Posted in Urdu Ghazals